Sjálfbærni – MÚÚ

Græn skref Reykjavíkurborgar

Verkefnið Græn skref í starfsemi Reykjavíkurborgar snýst um að efla vistvænan rekstur í starfsemi borgarinnar og minnka umhverfisáhrif sveitarfélagsins.
Samkvæmt loftslagsstefnu og aðgerðaráætlun um kolefnishlutleysi árið 2040, sem sett var fram árið 2009 og endurskoðuð 2016, verða allir vinnustaðir Reykjavíkurborgar að tileinka sér grænar áherslur í rekstri og vera aðilar að Grænum skrefum Reykjavíkurborgar.

Grænu skrefin eru fjögur skref með aðgerðum sem hjálpa til við að gera rekstur og starfsemi vistvænni. Í fyrsta skrefi eru einfaldar aðgerðir sem ætti að vera auðvelt fyrir hvern vinnustað að setja í farveg og flestir vinnustaðir hafa jafnvel nú þegar tileinkað sér þær aðgerðir. Síðan í hverju skrefi verða aðgerðirnar veigameiri, þar sem vinnustaðir halda grænt bókhald og setja sér umhverfisleg markmið.

Með þessu er hægt að draga verulega úr neikvæðum umhverfisáhrifum af starfseminni og efla vistvænni innkaup og rekstur.
Sjá nánar hér: http://graenskref.reykjavik.is/

EcoRoad - Sjálfbærni skólasamfélags

Náttúruskóli Reykjavíkur ásamt Ártúnsskóla tóku þátt í Erasmus+ samstarfsverkefninu ECORoad – Improving education for sustainable development through development of school culture. Aðrir skólar og samstarfsaðilar voru frá Finnlandi, Belgíu og Englandi. Verkefnið hófst í september 2016 og hlaut Erasmus+ styrk til þriggja ára. Markmið verkefnisins er að bæta menntun í sjálfbærni með þróun á skólasamfélaginu sem heild. Verkefnið var tvískipt. Annars vegar var um að ræða námsdvöl kennara í þeim skólum sem tóku þátt í verkefninu og hins vegar vinnufundi þar sem fram fór upplýsingaöflun, undirbúningur og fræðsla sem m.a. var nýtt í gerð handbókar.

Vefsíða verkefnisins er https://ecoroad.weebly.com/ en handbókina má nálgast með því að smella á myndina hér til hliðar.

Skólar á grænni grein - Landvernd

Skólar á grænni grein (Eco-Schools) eru alþjóðlegt verkefni sem menntar milljónir nemenda í 67 löndum víðsvegar um heim í sjálfbærni og umhverfisvernd. Verkefnið byggir á lýðræðismenntun og getu til aðgerða.

Skólar á grænni grein fylgja sjö skrefa ferli sem efla vitund nemenda, kennara og annarra starfsmanna skólans um umhverfismál. Ef skólinn nær markmiðum sínum fær hann að flagga grænfánanum til tveggja ára og fæst sú viðurkenning endurnýjuð ef skólarnir halda áfram góðu starfi.

Verkefnið hefur víðtæk áhrif og taka skólar ábyrga afstöðu í málum sem snerta umhverfið. Með því að innleiða raunhæfar aðgerðir og vinna á markvissan hátt að sjálfbærni í skólanum sýnir reynslan að skólar geta sparað talsvert í rekstri.

Jörð í hættu - verkefnakista um sjálfbærni

Jörð í hættu!? er nemendastýrt þemaverkefni sem samþættir náttúru- og samfélagsgreinar í unglingadeild. Verkefnið tekur mið af hæfniviðmiðum og lykilhæfni Aðalnámskrár frá 2011 sem byggja á grunnhugmyndum um menntun á 21. öldinni.

Jörð í hættu!? byggist á 5 þemum sem eru Loft, nauðsynjar, Rusl, Vatn og geta til aðgerða.

Öll eru þemun eins uppbyggð; stutt kveikja, umræður, nemendur skipuleggja sig og hanna rannsóknarspurningu og njóta þar leiðsagnar kennara. Nemendur ákveða hvaða viðfangsefni innan þemans þeir taka og einnig á hvaða hátt þeir vinna það og koma því frá sér. Áhersla er lögð á gagnrýna hugsun, sköpun, frumkvæði og frumleika.

Kolefnisreiknivélin

Landsmenn þurfa að minnka kolefnissporið sitt verulega. Neysludrifið kolefnisspor hins almenna íbúa á Íslandi er um 12 tonn CO₂ ígilda á ári en þyrfti nú þegar að vera um 4 tonn CO₂ ígilda til að halda hnattrænni hlýnun innan 1,5°C markmiðs Parísarsamkomulagsins.

Nú getur þú reiknað kolefnissporið þitt fyrir síðastliðna 12 mánuði og fengið upplýsingar um hvað þú getur gert til að minnka það. Miðaðu forsendurnar við þig sem einstakling en ekki út frá rekstri alls heimilisins.

Hreint haf námsefni - Landvernd

Landvernd hefur gefið út nýtt námsefni um hafið. Rafbókin Hreint haf fjallar um haflæsi (ocean literacy) og áhrif mengunar á hafið. Hafið er notað sem rauður þráður í kennslu um loftslagsbreytingar, neyslu og sjálfbærni.

Haflæs manneskja gerir sér grein fyrir mikilvægi hafsins í lífi okkar og annarra lífvera á jörðinni og vinnur að því að gæta að heilbrigði hafsins. Haflæs manneskja miðlar upplýsingum um hafið á áhrifaríkan hátt og tekur upplýstar og ábyrgar ákvarðanir í daglegu lífi sem styðja við heilbrigði hafsins.

Markmið
Að nemendur verði læsir á gildi hafsins í lífi þeirra og mikilvægi þess hjá lífkerfum jarðar.
Að nemendur skilji mikilvægi hafsins fyrir lífkerfin á jörðinni og geti skýrt hvernig hafið hefur áhrif á loftslag, framleiðslu súrefnis, fæðu og lífbreytileika (haflæsi).
Að nemendur þekki uppruna og sögu plasts, eiginleika og kosti þess.
Að nemendur læri um plastmengun í hafi og hvernig hægt sé að koma í veg fyrir hana.
Að nemendur öðlist færni, getu og þekkingu á því hvernig hægt sé að takast á við plastmengun í hafi.
Að nemendur þjálfist í að taka eigin ákvarðanir og vinni í heimabyggð.

Varðliðar umhverfisins

Varðliðar umhverfisins er yfirskrift verkefnasamkeppni grunnskólabarna í 5. til 10. bekk. Markmið keppninnar er að hvetja ungt fólk til góðra verka í umhverfisvernd, vekja athygli á sýn ungs fólks á umhverfismál og kalla eftir leiðsögn yngri kynslóðarinnar á því sviði. Umhverfis- og auðlindaráðuneytið, Landvernd og Miðstöð útivistar og útináms standa að keppninni